Na kombo ya nguya ya … too pe ebele ya lokuta oyo Bokristo ememela biso.

Soki nakoti na kati ya supermarche moko boye esika Mama Esengo azali kosala ba kurse na ye elongo na batu bayike misusu pe nabuaki mbela na kombo ya Madame Lajoie, bozala na kondima ete Mama Esengo akoyanola na mbela na ngayi te. Soki bozali kosambela Santu na kombo ya Likonzi na kobengaka ye Pilier, ezali na shance ata moke te apesa bino eyano na bosenga na bino. Po na bosolo, kombo na kombo ebungisaka nguya na yango soki odeforme yango, pe ezalaka mabe koleka soki obongoli yango na lokota mosusu, na tango wana ebungisaka nguya na yango mobimba pe etikalaka lisusu na efe ata moke te. Kombo ya solo ebongwanaka te selo mboka too monoko ya molobeli na yango, ndakisa soki tozui Maradona, Mao, Mandela, Lumumba too pe Kimbangu, yango ezali bakombo oyo ebongwama ata moke te kelekeswa mboka balobeli na yango bafandaka. Kombo ezali ebengelo oyo mutu na mutu azali na oyo ya ye, kombo ezali elembo oyo elataka mutu pe ekesanisaka ye na kati ya batu nionso, yango wana ekoki kotengamisama te. Mutu nionso akosepela te soki soki batengamisi too pe balobi mabe kombo na ye, ya mabe koleka soki bameki kobongola yango na lokota mosusu, na tango wana ekozala lisusu kolobela ye te. Lokola yango endimami, tolobela sik’oyo maye matali kombo ya “Jésus Christ” oyo ezali sije ya aritikile eye. Na bosolo, banda kala nazalaki komituna ndenge nini baboti ya ba Yuda ya epoke wana bakokaki kopesa muana na bango kombo ya bayi Eropa na lokota ya kigreke, bango batu bazalaki batu ya lokota ya arameyen. Motuna wana etungisaki nga bambula na bambula, dayere nalobelaki yango mua moke na aritikile na nga nabimisaki na titele ya “Eglises de réveil, balembisi ya ntombua”. Lelo na ebandeli ya ere ya Verseau, ere ya bosolo, makanisi na nga efungwami penza pona koluka kolongola ba dute pe komonisa bosolo na yango, yango na desidaki nabanda bolukiluki na likambo yango, na yango, oyo na dekuvrire elakisi kaka ete nazalaki na rezo pe yango eleki oyo nazalaki kokanisa na mosika. Oyo na dekuvrire, nakokaki kobomba yango pona ngayi moko, kasi eloko moko eleki nga na makasi ezali kotinda nga nabimisa yango na boyebi ya batu nionso po esunga peple na biso na kobima na lokuta monene oyo bakotisa biso wuta kala pe oyo tozokoka kobima na yango te tii lelo. Oyo na dekuvrire yango oyo :

Sima ya liwa ya “Mutu ya Nazareth” na mobu 33, ba disipele na ye bakendaki bipayi na bipayi pe babandaki mosala ya kopanza mateya na ye ontei ya bikolo nionso ya mokili oyo na eleko wana ezalaki koleka nzinga-nzinga ya Galilée te, elingi koloba Moyen Orient, Eropa, Ezipiti pe Delta ya ebale ya Nile. Na kati-kati ya ekeke ya mibale, mateya ya mokonzi na bango esilaki kokoma bipayi nionso na bassin ya Méditerannée pe na ba mboka biyike ya Eropa, yango epesaki okazio na ba nganga Nzambe ya Grece pe ya Roma ya kozua likanisi ya koyiba dokitrine wana ewutaki na Orient po bakomisa yango ya bango pe ekoma relizio na bango. Eloko ya liboso bakanaki kosala, ndenge bango ba mindele ya Eropa bazalaka na complexe ya superiorite likolo ya ba rase nionso ya mokili, lokola balingaki ata moke te kokumisa kombo oyo ezalaki kolakisa kibopaya na yango epayi ya bango bayi Eropa, ezalaki ya kobongola kombo ya “Mutu ya Nazareti” po ekoma kombo ya moyi Eropa, yango esalaki ete “Yehoshua Ha Mashiah” ekoma “Jésus Christ” na sima ya bobongoli na yango na kigreke. Kasi basukaki wana te, kaka na makanisi na bango wana bazuaki pe mokano ya kobongola ba kombo ya baye nionso batambolaki na “Mutu ya Nazareti” na tina ete lisituale na ye ekoma lisituale ya bayi Eropa. Ezali nde kombo wana ya Christ mutu ebotaki kombo ya christianisme oyo tokobenga bokristo pe ekosala ete ba Nazaréens (Notsrim) oyo bazalaki bandimi ya secte ya ba Yuda eye ekelamaki na “Mutu ya Nazareti” bakoma ba Chretiens too bakristo, christianisme wana ya yambo ebengamaki na kombo ya orthodoxe. Sima na yango, na ekeke ya mineyi (IV^e), Empereur Constantin 1^er azuaki mokano ya kosala religion officielle pona Empire Romain oyo akosalela pona kolendisa bokonzi na ye likolo ya popilasio nionso ya empire, na yango apesaki motindo na ba nganga Nzambe nionso ya empire oyo bazalaki yakopanzana na ba sekete kili-kili po basangisa ba dokitrine na bango pon’esala relizio yango. Relizio yango ekozua kombo ya catholicisme pe ekolatama na lingomba bakobenga Eklezia Katolike ya Roma oyo mboka mokonzi na yango ekozala Roma kasi Jerusalem (Ieroushalaïm) te ndenge esengelaki ezala soki ezalaki oyo ya “Mutu ya Nazareti”, catholicisme yango ekokoma eteni ya mibale ya christianisme na mopanzi ya eteni ya Orthodoxe. Ndenge moko pe bayaki kobota lisitwale ya sika pona mokonzi na bango ya sika “Jésus Christ” na bosangisi ya lisitwale ya “Mutu ya Nazareti” na masapo ya kibopagano ya ba Romains ya eleko wana oyo soki na tango wana ekokaki kondimama kasi na kilelo ata mutu moko te akoki kondima yango, nionso wana kaka pona konetola mokonzi na bango ya lokuta “Jésus Christ” pe batu bamona ye mistike. Na bokobi ya mosala ya baye basalaki liboso na bango ya koyiba lisitwale ya “Mutu ya Nazareti” na ndenge babongolaki ba kombo ya batu na kati ya lisitwale yango po ekoma ya bayi Eropa, bayaki kosala ete bililingi ya bilongi na bango bikoma ya bayi Eropa ti tokoma lelo na nivo ete “Jésus Christ” na bango akoma blond na misu ya bule. Boyeba ete kaka ndenge bakomisa “Mutu ya Nazareti” mondele ya Eropa na kombo ya “Jésus Christ”, ezali pe kaka ndenge moko babongolaka moyi Chine na kombo ya Kong Qîu Zhongni po bakomisa ye Confucius sima ya kobalola kombo na ye na lokota ya Latin, nionso wana po andimama na biteyelo na bango ya philosophie, yango pe kaka mutu etindaka bango baluka kokomisa ba Farao ya Ezipiti mindele ata ko biso nionso toyebi ete bakoko na biso wana bazalaki na loposo ya moyindo makasi penza.

Lokola lisolo nionso eye ebotamaka na likanisi ya mutu, oyo ya bokristo pe ekoya kobota ba verisio biyike na sima ya bambula pe bikeke oyo ekelamaki na ba sekite oyo ebotamaki na bokabuani ya mama ya mangomba ya bokristo na pe ya biteni na yango lokola. Yango wana tokomona mangomba mayike ya binzambi-nzambi oyo ewuta na lingomba ya ba protestant, moko na moko na yango ebota lisituale na yango oyo ezali fikisio ebotama na likanisi ya mutu moko Songolo, eloko moko kaka esangisi bisituale wana ezali ete nionso elingi kokumisa mokonzi na bango na kobotelaka ye ba puvware pe makamuisi ya kafu-kafu koleka oyo bandimi ya liboso bapesa ye, elingi koloba lingomba na lingomba elingi kosukola pembe koleka pembe ata ko biso nionso toyebi ete lisolo ya solo ezalaka obele na verisio kaka moko, elingi koloba ete lisitwale ya ba verisio ebele elakisaka bosolo te. Ezali nde lisitwale wana bayaki komemela biso pona kobungisisa biso nzela ya bonzambe na biso oyo bakoko na biso kosalelaka wuta kala, ezali pe kaka lisitwale wana oyo tozosalela na kilelo sima ya kobakisela yango oyo ya biso mua doze ya ba puvware pe makamuisi. Po, na maye matali kobota makamuisi, mitu na biso mitikali sima te, batu ya lelo bazo koba kaka na kobota makamuisi ya ndenge na ndenge oyo balatisaka “Jésus-Christ” na bango. Ba peple nionso epayi lisituale ango ekomela bamona pe kaka malamu ya kobongola kombo ya “Jésus-Christ” ya ba greco-romains na monoko na bango ndenge yango esalemaka na ba personnage nionso ya fikisio. Ya solo endimami na biso nionso ete kaka ba kombo ya ba fikisio nde bakoki kobongola na ba lokota ya mboka mosusu esika bakolobela yango, ezali bongo na ba kombo lokola oyo ya Père Noël, ya Mickey too pe misusu, po soki bobongoli kombo ya Maradona na monoko na bino, ekolobela lisusu Maradona te. Soki pe totali maye matali kombo ya “Jésus-Christ”, bobongoli ya kombo ya “Mutu ya Nazareth” ezali kobendana na likebisi na ye moko ndenge ekomama na Actes 4, verset 12 : “Ezali na lobiko ata na kombo mosusu te, na se ya moyi ezali kaka na kombo moko oyo epesamela batu oyo bakoki kobikela, kombo’ango ezali Yehoshua Ha Mashiah”.

Lokola kombo ya “Jésus-Christ” etikala kozala kombo babengelaka “Mutu ya Nazareth” te, tokoki kotatola lelo ete oyo nionso elobamaka na kombo wana ezali kaka makanisi ya batu pe etikala kozala reyalite te, elingi koloba ete kombo wana ezali n’ango libungutulu ya pamba po etikala kolatama na mutu te, kasi lokola mokili eboyaka vide, kombo wana ekoki koyamba milimo nionso ya mabe oyo etelenganaka na mokili, na yango kobelela kombo’ango ezali lokola kobenga molimo moko ya mitelengano. Dayere, bango moko bakeli na yango babangaka yango te, kutu babangaka yango ndenge bana mike babangaka kombo ya Pere Fouettard, elingi koloba ata na riske moko te ya kozua etumbu, tala kaka ndenge ya bizaleli na bango. Po, soki totali bakumbi ya bokristo, bango moko ba ezitaki te, na kombo ya lokuta ya “Jésus-Christ” liboso, ya kosala ba masakre mayike ya ba peple ya ndenge na ndenge awa na mokili ya se, bayiba-yiba, bapiya-piya, baviola-viola pe bakomisa batu bawumbu na bango pona kokokisa ba posa na bango ya boyimi n’esika bakende kopanza bolingo oyo “Mutu ya Nazareth” ateyaki pe akokaki kosuwete. Lelo, tokoma komona na ba sosiete oyo ezali baze na bokristo yango nde etondami na mabe koleka, na ba feti na bango oyo babengi relizie ezali relizie kaka na kombo po yango ekoma n’ango pretexte pona kokumisa vre mokonzi na bango oyo abengami “Mosolo”. Na kati ya ba sosiete wana, pona kozua bomengo, esengeli koyiba, kokosa, koesikroke, kotriche, kofalisifiye, kopirate, koboma, po epayi na bango kaka mabe nde efutaka, tala kaka makambu sinema na bango elakisaka, oyo ezali kitala-tala ya ba sosiete na bango, ba stare na bango ya minene bazali baye basalelaka mingi minduki to pe oyo bamilakisaka mingi na misala ya mabe. Bango kaka ba provokaka too ba antretenaka ba gere pona mosolo, ba kreyaka pe ba antretenaka mangomba ya ba terorisite pona kokokisa ba posa na bango ya boyimi, ndenge moko pe ba provokaka too pe ba antretenaka ba maladi n’esika ya kosilisa yango, nionso wana kaka pona kosalela mokonzi na bango “Mosolo”. Ezali nde bizaleli wana ya mabe oyo eya kokontamine ba sosiete na biso na nivo oyo ezali ete lelo na ba sosiete na biso ya bokristo, baye bamibengi basali ya “Jésus-Christ” bazali koluka kaka kozua bomengo na kombo’ango oyo ekoma lokola pompi ya mosolo. Na yango, ekokamuisa mutu te soki tomoni na ba mboka na biso ba pasitele bakoma kokoopere na bakonzi ya mbulamatari oyo baleyisaka bango na kopesaka bango ba dime likolo ya biye bayibaka na bakesi ya Leta.

Na ba sosiete oyo ezali baze na bokristo, bakomisa depravasio ya bizaleli lokola ntombua ya sivilizasio, po kategori moko ya batu oyo balingi bamikomisa bakonzi ya mokili ya se bazui mokano ya komikangolama na bokonzi ya Nzambe pe ya ko corije oyo Ye akela. Kaka baye wana na bokristo na bango batungisaki biso na kopekisa biso poligami, bango kaka lelo balingi koempoze biso mabala ya batu ya sexe moko, bazotia molende na komobilize ba media na bango nionso pona kokotisa biso na mitu ete libala ekosangisa batu ya sexe moko endimami pe balingi koempoze biso na lisungi ya Vatican ete sodomi ezali eloko ya malamu pe ekoki kozuama lokola ndenge mosusu ya kosalela bana, bana oyo bakoya kozua epayi na biso. Kasi eza n’ango likambo ya kokamua te soki Vatican azali kondima pratike yango, bakomi pe pene ya kondimisa biso ete “Jésus-Christ” na bango akokaki pe kondima pratike wana, kasi po na yango bakoki kobanga ata moke te ya kosala blaspheme lokola “Jésus-Christ” ango atikala na ye kozala te. Elobamaka pe ete sodomi ezalaka rite oyo ba adepte ya Satan basalelaka pona kozua nguya ya kodomine batu misusu too pe rite pona koleka na nivo ya likolo na kati ya sosiete, tala kaka pona kondima maye nazali koloba ndenge batu’ango batondi ontei ya batu oyo bazali kokonza ba sosiete na bango too pe ya batu ya lokumu na ba mboka oyo batia bizaleli’ango liboso. Ezali pe likambo ya kokamua te komona ete mode ya lelo na maye matali promotion canapé etali sirtu baye bavivaka na monde wana na mention speciale na batu oyo bakoti sika, oyo bazui mokano ya kokatisa ngambu pe bandimi kufongola nzela na bango ya sima na ba anzelu ya bobe, elingi koloba na puvware ya mbongo oyo batu ya monde wana bazangi n’ango te. Bokoki komona bino moko molende etiamaka po batu bazalaka na monde wana to pe oyo bazokota sika bazala liboso ya sene pona kolakisa sosiete ya sika oyo balingi koempoze biso, tozali komona bango ndenge bazali kokota bisika nionso oyo bakoki kozala pona kopesa ndakisa. Bakomi tii na nivo ya kokamata na otaje arc-en-ciel na biso, oyo na bonzambe na biso ezali elembo esanto, pona kokomisa yango sembole ya bizaleli na bango ya bosoto pe esalelo ya propagande na bango, bazosalela yango na loma pona kokotisa na mitu ya moko na moko na biso bizaleli wana ya bosoto na ba nzela nionso bisika misu na biso ekoki koleka na lisungi ya ba reprezanta na bango oyo batondisi na ba media na bango, ezo monana pe ete bazali kosala nionso pona kokotisa bizaleli wana na makanisi na biso na nzela ya ba filme nionso ya televizio to pe ya cinema, yango tokoma komona ndeti ba scénaristes nionso bazua mitindo ya kokotisa mua doze ya homosexualité na kati ba filme na bango.

Wuta mokili ebanda, na kati ya ba sosiete na biso ya Afelika, libala ezalaka kaka aliyanse oyo esangisaka mabota mibale pona kobotisa bana bakotondisa yango, kasi tala sik’oyo ba sosiete ya Satana balingi koempoze biso mabala ya batu ya sexe moko oyo biso nionso toyebi ete ekoki kobota bana te. Orke na kilitire na biso, toyebi ete libala ezanga bana emonanaka lokola libala ezanga tina, yango wana na likambo’ango tozomona te ndenge nini famiye moko Songolo ekoluka kokende kofuta dote na famiye Mpakala pona mutu oyo akoya kosodomize muana na bango ya mobali. Bonzambe na biso eteyaka biso ete nzoto ya mutu ezali kaka elamba elataka molimu oyo ezongaka na mokili ya se pona kokolisa karma na ye too pe pona kokokisa misio moko songolo. Na ngambu mosusu, na opozisio ya oyo bamindele oyo bamimonaka likolo ya rase nionso bakanisaka, kosala muana ezali likambo ya ya tekinike te kasi ezali eloko ya molimo penza, po bosangisi ya nzoto pona kosala muana ezali nzela oyo tobengiselaka milimo ya Lodela oyo tozali na bango singa moko po bapona moko na bango oyo akoya kolata nzoto ya muana oyo akoki kobima na bosangani na biso, elingi koloba ete kosala muana libanda ya acte ya bosangisi nzoto ezali okazio ya kopesa nzela na milimo ya mabe baya kokota na kati ya nzoto ya muana oyo akobotama. Na kosalaka propagande ya mabala ya “papa-papa” too pe “maman-maman”, tozali koriske tobanda komona na bambula ekoya bana bayike oyo basalama na ba labo, konsekanse na yango ekozala ete batu ya milimo ya mabe ya Satana baya kotondisa mokili. Ezali pe kolobama ete kala mingi te ba adepte ya Satana bakopesa pe ndingisa na ba mariages zoophiles oyo ekosangisa batu na bibuele na bango ya ndaku, na wana pe ekozala kaka bino batu bokobotela bango bana oyo balobi ete baza na droit yakozala na bango, tala esika tokomi n’ango lelo.

Esali sik’oyo bikeke bitano wuta ba emperiyalisite baya koempoze biso bokristo biblia na loboko moko monduki na loboko mosusu, tala sik’oyo kaka bango wana balingi lelo koempoze biso bizaleli na bango ya mabe na se ya ba menase ya ba sanctions économiques ! Wana ezali likambo tokoki ko profite na yango po nakanisi ekomi  tango oyo tosengeli kolamuka pe tozua consianse ete ezali nde biso batu tozali na nkita, ezali bango te, bango baza kaka na ba masini ya kosalela ba papie ya bilili oyo ebengami ba biye ya banke too makasa ya mbongo, oyo ezali komonisa Nzambe na bango “Mosolo”. Na kati ya mboka moko, mutu oyo azo komikumisa mvuama po atondi na ba papie ya bilili akoki komenase na boyikote te baye basimbi biloko oyo eleyisaka ye, po soki bango badeside batika kotekela ye, ye nde mutu akokufa na nzala, bango te, elingi koloba ete puvware ezali na batu oyo bazali na biloko kasi na oyo azali na ba papie ya bilili te. Yango wana nakolinga ete bakambi ya Afelika ba profite na okazio oyo pona kobongisa mokano oyo ekobimisa biso libela libela na système colonial oyo balengelaka na Conférence ya Berlin oyo esala ete ba mboka na biso ezala kaka bibombelo ya ba matières premières esika wapi ba emperiyalisite bayaka kozua biloko ya kotombolela ba mboka na bango na bozangisi bua yango na ya oyo ya biso. Mokano wana esengeli ezuama na nivo ya Afelika mobimba, elingi koloba na nivo ya Union Africaine oyo akolengela bopekisi na mboka moko na moko ya kotekisa ba matières premières na ye na état brut pe ya koempoze na batu nionso oyo bazali na posa na yango baya ko installer ba infrastructures ya transformation na ba mboka na biso. Na yango pona kopesa tango na ba partenaires potentiels ya komilengele pe ya kotia ba installations na bango, tosengeli kobongisa date limite oyo na sima na yango mokano na biso ekokoma kosalemela. Na kati ya periode wana, tosengeli lisusu kondima ba papie ya bilili te pona kotekisa nkita na biso na libanda ya mboka, ba echange na biso esengeli kosalema contre ba produits too ba services ekokana yambo ete système monétaire équitable ebanda. Wana ezali nde likanisi na ngai pona tofungola miniololo ya bowumbu oyo bakangela biso na ba emperiyalisite, oyo ezo koba kokanga biso pe epekisaka biso ti lelo to profite penza na ba richesse na biso, yango ekosala ete tokoma na position de force. Kasi toyeba ete nionso wana ekosalema na bopete te, ekoluka tosala ba sakrifise ya minene, elingi koloba ete tosengeli kondima na koleka na batango ya pasi penza na kati ya periode transitoire wana, ezali se kaka na talo wana oyo tosengeli kofuta pona tolonga lipanda na biso ya siki-siki. Na ngambu mosusu, ekozala malamu mokano mosusu ezuama ya kopekisa bayi Afelika bapesa bana na bango na bobokoli na ba kuple ya batu oyo, na ndenge bazali na sexe moko, bakoki kobota bana te na ndenge ya natirele.

Soki lelo Vatican ezui mikano oyo ezobalana na bobino te, bino bakristo ya Afelika boza na tina te ya kozala shoke, po bobosana te ete bokristo, ndenge nawuti koyebisa bino, ezali kreyasio ya ba greco-romains pe bosengeli koyeba ete dokitrine oyo ebotaki yango ezalaki kobalana na kilitire na bango, elingi koloba ete soki bango batu bakelaki yango bamonaka homosexualité eloko ya malonga, na druwa nini bino bapaya bokoya kotelemela eloko oyo ezali ya bino te ? Eske mondele too mutu oyo azali Congolais te akoki koya koloba na Congolais abongola ndenge ya kobetela Rumba po ye azo sepela te na ebeteli na yango ? Bino bodeside ya kokoba na kokangama na bonzambe oyo bino boyebi ndenge ebandaki te, bozali lokola muana mosala oyo patro na ye oyo aleyisaka ye pe alalisaka ye na ndako na ye azui mokano ya koempoze bilei oyo epekisami koliama na kilitire na ye. Na sitiwasio wana, muana mosala’ango aza kaka na ba solisio misato, ya liboso kondima bilei wana ya sika pe kopesa mokongo na kilitire na ye, ya mibale kosala bilei na ndenge na ye pe na mbongo na ye moko, ya misato kolongwa na mosala epayi ya patro wana pe kokende kosala epayi ya patro mosusu oyo abongi na ye. Na maye matali bino bakristo ya Afelika, na kotala mikano oyo ezuami na bakonzi ya mangomba na bino, bozali kaka na ba shwa mibale, ya liboso bodeside ya kosala lingomba na bino ya sika oyo ekozala baze na mateya ya “Mutu ya Nazareth”, ya mibale bodeside ya kobaluka epayi ya bonzambe oyo ebalani na kilitire na bino, bonzambe yango ezali, ezali oyo bakoko na bino bazalaki kosalela yambo ete ba mindele ya Eropa baya, yango ekundolamaka na batindami bayike bikeke na bikeke oyo na kati na bango tokomona mosantu na biso Yaya Vita Kimpa oyo, sima ya koyamba bolamusi ya Ne Muanda Kongo, azuaki misio ya kosunga peple na ye na bokangolami na ebele ya lukuta ya bokristo, oyo na sima ya koboya kosundola bonzambe bazongiselaki ye, andimaki kopesa bomoyi na ye mbeka na ndenge andimaki liwa ya kotumbama mobimba likolo ya koni na ba mumpe ya Katolika. Na suka na molongo ya batindami nde ezali oyo tobengi Grand Maître Ne Muanda Nsemi oyo atindamaki pona koya kozongisa kilitire na biso na ebonga ya lokumu pe kolakisa biso bonzambe na biso, awutaki kotika biso mokolo ya Mercredi 18 Octobre 2023 pe atikeli biso eritaje ya mikanda miyike ya bonzambe na biso oyo tosengeli kotanga pona koyekola yango. Bonzambe yango kombo n’ango “Nzila Kongo” oyo elingi koloba nzela pona kokende epayi ya Nzambe, ezalaki lege na peple Kongo na Seniele Akongo po apanza yango epayi ya Bayindu nionso ya Afelika na baye bamemama na mikili ya Amerika. Wana ekozala kaka lokola kozonga na ndaku na bino, po ndenge balobaka, mpongo atako asali ba ture ndenge alingi suka suka asilaka kaka kozonga na zala na ye. Bondimela ngayi, bandeko na ngayi, mokolo bokomikotisa na kati na yango, bokoyoka lokola bozali kodekuvrire ete baye bozalaki kokanisa bazalaki baboti na bino nzoka nde bazali na bango batu ya lokuta pe miyibi oyo bayibaka bino epayi ya baboti na bino ya siki-siki eleko ya mbotama na bino na maternité pe boko regrete tango molayi nionso oyo bobungisa na koyebaka yango liboso te.

Bokristo ezali eloko oyo ba mindele basalelaka pona ko kokotisa biso na bowumbu pe kosukola biso bongo, pona kobosanisa biso kilitire na biso, epesaki makoki na ba emperiyalisite ya kolalisa bayi Afelika pongi pona koyiba nkita na bango malamu. Ndenge kaka nalobaki likolo, bino bandeko na ngayi na kati ya Afelika too pe ontei ya mikili ya Amelika oyo bomibengi bakristo, boyeba ete tango bobelelaka “Jésus Christ”, na bosolo bobelelaka na bino libungutulu ya pamba pe kozua eyano na kombo ya nguya ya “Jésus-Christ” ezali kaka oyo babengaka efe pisikolojike ya bondimi na bino mutu esalaka kasi akisio na ye penza te. Biyano bozuaka ekoki pe kozala biyano ya Nzambe ya Bakoko na bino oyo ayebi ete bozalaka na bobungi ya bonzambe wuta baya koboyisa bino oyo ya bino, Nzambe ya Bakoko oyo alengelaka bino na kuzu kasi bino boyebaka te, ayanolaka bino ndenge baboti bayanolaka bana na bango na bosenga na bango oyo bakanisaka ekendaka epayi ya Père Noël. Biso nionso tosi toyoka makamuisi esalama na kombo ya Santu Songolo to Santu Mpakala, batu oyo bazalaka na bomoyi na bosolo, kasi na ndenge nga nayebeli, naïnu nayoka likamuisi moko esalema na kombo ya “Jésus-Christ” te soki tolongoli oyo ya imazinere balakisaka biso na ba fikisio ya sinema, ya teyatre too pe na ba kreyasio ya mikolo’oyo oyo ezotondisaka ba rezo sosio lokola TikTok, na mokuse oyo nionso ebotamaka na mitu ya ba senariste oyo batonda imazinasio ezanga suka. Bongo sik’oyo eloko nini elekaka soki obeleli kombo wana ? Lokola kombo wana etikala kolatama na mutu te, koenvoke yango ezali kobelela na vide too koriske kobenga milimo ya mitelengano, oyo ezali milimu ya mabe, too pe Satana ye moko. Baye bazali kozela lisungi na kombo ya nguya ya “Jésus-Christ” basengeli na bango kobosana likanisi wana, elingi pe koloba ete soki boyoki mutu azoloba ete azuaki mesaje ya “Jésus-Christ”, bozala sire soki ezali ilizio te, ekozala lokuta too pe esikrokeri, pe nakoloba na basi nionso baye babala “Jésus-Christ” ete ezali n’ango lokola kobala Adamu too pe Père Noël. Na bino bokanisaka ete balamusa bino na mangomba ya reveye, boyeba ete na bosolo bozali na bino na kati ya pongi ya makasi penza. Soki baye bamemelaki bino bokristo bazali komivandisa na kati ya bobe pe bazali kosala promosio na yango, elingi koloba ete bango moko bandimaka mateya na bango te pe bonzambe na bango ezali mabe. Ba sosiete ya bakoko na biso oyo ezalaki kokambama na mobeko ya Nzambe, yango ezalaki kopekisa mutu asala mabe na bobangi ya kozua etumbu, esika oyo ya makasi koleka ezalaki ya kokundama bomoyi liboso ya batu nionso na zando, kasi na moyi ya lelo na kati ya ba sosiete na biso ya bokristo, bobangi ya zandalame, oyo ye moko azali mutu ya kaniaka, ezopekisa mutu te na kokueya na kati ya mbeba.

Pona kosukisa, soki Yehoshua Ha Mashiah azalaki motindami ya Yaveh pona kokangola  peple ya ba Juda oyo bazalaki na bowumbu ya ba Romains, biso bana ya Afelika toyambaki pe oyo ya biso batindami ya Tata Nzambi’a Mpungu Tulendo pona kokokisa mosala moko songolo oyo na kati na yango tozali na Mfumu Kimbangu oyo atindamaki pona koya kokangola biso Bayindu na bowumbu ya mindele ya Eropa. Atako esepelisi ba Kimbanguistes te oyo lingomba na bango ekelemaki na ndingisa ya bakoloni ya Belezi oyo baniokolaki Mfumu Kimbangu pe bapesaki kondisio na bokeli na yango ya koloba ete Mfumu Kimbangu azalaki motindami ya “Jésus Christ” na bango, kasi lokola towuti kolakisa ete kombo’ango ezali libunguntulu ya pamba, elingi koloba ete litatoli wana eza n’ango lokuta. Na  reyalite, na kokomisa Mfumu Kimbangu motindami ya “Jésus Christ” na Congo, bakoloni ya Belezi bazalaki koluka kokitisa bonene ya Mfumu Kimbangu na kokomisaka ye mukala ya ero na bango ya Eropa na kombo ya “Jésus Christ” pe na kokotisa ye na bokristo na bango, kasi lokola “Jésus Christ” yango atikala na ye kozala te, elingi koloba ete Eklezia Kimbangiste etikali lisusu na baze ya bonzambe te. Soki peple ya ba Juda oyo ekambemi na Yaveh ezali peple oyo eponama pona kolakisa bonzambe na ba peple ya Moyen Orient pe ya Eropa, boyeba ete peple Kongo ya Seniele Akongo ezali peple oyo eponama pona kozala motu ya ba peple nionso ya Bayindo oyo bakokisaka biteni zomi na mibale ya baye bawuta na koko moko na kombo ya Ne Nzala Mpandu. Lelo na ebandeli ya ere ya Verseau, ere ya bosolo pe ya boyokani ya ba peple nionso, ekomi pe tango po biso bana ya Afelika na Bayindu nionso oyo bamemama na mikili ya America tofungola miniololo ya lokuta oyo bakangela biso, oyo ewumeli pe mingi pe ebebisa mitu na biso pe ebosanisa biso bonzambe na biso, ekomi tango pona biso tozonga na ndaku ya Tata Nzambe na biso oyo azozela kaka biso tozonga po atondisa biso na nguya na ye pe asunga biso na botomboli ya bamboka na biso na ndenge ya bobiso kasi na ndenge oyo bapaya balingi tozalela te. Ekomi tango pona biso tolata molimo ya rebelio pe tolanda ndakisa ya mosantu na biso Yaya Vita Kimpa oyo ekopesa biso nguya ya kokoba mosala ya kolamusa Bayindu nionso pe kokangola mantale na bango ndenge ye moko abandaki yango kasi asilisaki te, mosala oyo tosengeli kosala pona peple Kongo mobimba, ba peple ya Afelika pe bakitani ya Bayi Afelika nionso. Totikela bayi Eropa kombo na bango ya “Jésus Christ” oyo bango moko babotaki, totika bango bakoba kosambela ero na bango ya lokuta pe bakoba kondima masitwale na bango ya kofonde, na ngambo na biso tozongela kaka oyo ya biso bonzambe. Na baye balingi kokoba kobelela “Mutu ya Nazareth”, nakopesa bango toli babenga ye na kombo na ye ya bosolo soki balingi bazua eyano na ngambu na ye.

KUETE NZA-YAZOLA’MO MUE NDAMBA NGOYI.

Patriote Résistant Kongo.

Aritikile ebandamaki kokomama na Septembre 2023                         Ebimi le 28/12/2024

Pona kotanga aritikile eye na Français, fina awa :

Pona telecharger aritikile eye na version PDF too ko imprimer yango, fina awa :